Dywedodd Arweinydd Propel Neil McEvoy,

“Mae miloedd o blant wedi’u lladd yn Gaza a bydd mwy yn marw oni bai bod cadoediad ar unwaith ynghyd ag ymgyrch ddyngarol i achub bywydau.

Bydd y trais llofruddiol gan Lywodraeth Israel mewn ymateb i'r trais llofruddiol gan Hamas yn bwydo mwy o fraw, mwy o gasineb a mwy o ladd i genedlaethau i ddod.

Fe ddaw amser pan fydd yn rhaid i bobl siarad a chydsynio neu gytuno i anghytuno.

Ni fydd heddwch byth yn y Dwyrain Canol hyd nes y bydd anghyfiawnder Palesteina wedi'i ddatrys. Mae eithafwyr ar y ddwy ochr yn bwydo oddi ar ei gilydd heb geisio canfod llwybr tuag at ddyfodol cyfiawn.

Dim ond un hil sydd ar y blaned hon, sef yr hil ddynol. Gwae ni os na lwyddwn i gydnabod hynny.

Rwy'n arswydo nad yw Arweinwyr gwleidyddol yn y DU a Chymru yn cefnogi cadoediad. Cywilydd ar Sunak a Starmer.

Mae meddyliau a gweddïau pob aelod o Propel gyda’r bobl ddiniwed sy’n dioddef ar hyn o bryd yn Gaza, Israel a’r Banc Gorllewinol.”